कोरोना जोखिम बढ्दो, पोखरामा दुई जना सङ्क्रमितको मृत्यु

पोखरा,२ भदौ । पोखरामा उपचारका क्रममा कास्की र तनहुँका एक÷एक जना कोरोना सङ्क्रमितको मृत्यु भएकको छ । पछिल्लो समय पोखरा सहित गण्डकी प्रदेशमा कोरोना संक्रमण बढिरहेको छ ।

पोखरा महानगरपालिका–१६ का ८७ वर्षीय पुरुषको आज विहान १०ः४० बजे पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पतालमा उपचारको क्रममा निधन भएको प्रतिष्ठानका निर्देशक सहप्राध्यापक डा अर्जुन आचार्यले जानकारी दिए ।

गत साउन ३२ गते उच्च ज्वरो तथा श्वासप्रश्वासमा समस्या आई उनी अस्पतालको इमर्जेन्सी विभागमा उपचारका लागि आएका थिए ।
कोरोना पुष्टि भएपछि उनलाई सोमबार अस्पतालको कोभिड उपचार केन्द्रमा राखि उपचार भइरहेकामा मृत्यु भएको अस्पतालले जनाएको छ । ती पुुरुषमा कोरोना सहित मधुमेह,प्रेसर लगायतका रोगको समस्या रहेको बताइन्छ ।

car ads

त्यसैगरी तनहुँको व्यास नगरपालिका–१ का ५० वर्षीया महिलाको पोखरा स्थित कास्की सेवा हस्पिटलमा उपचारको क्रममा गएराति ११ः३५ बजे मृत्यु भएको प्रदेश स्वास्थ्य निर्देशनालयका निर्देशक डा विनोदविन्दु शर्माले जानकारी दिए ।

हेपाटाइटिस,निमोनिया,सुगर, प्रेसर तथा मुटुको समस्याले गत साउन ३१ गते अस्पताल भर्ना भएकी उनको हिजो विहान पिसिआर परीक्षणका लागि नमूना सङ्कलन गरिएकामा राति ९ः०० बजे नतिजा पोजिटिभ आएको थियो ।

त्यसअघि दमौलीमा सामान्य उपचारपछि उनलाई पोखरा रेफर गरिएकामा आइसीयूमा राखेर उपचार भइरहेको थियो ।यससँगै गण्डकी प्रदेशमा कोरोना सङ्क्रमणबाट मृत्यु हुनेको सङ्ख्या सात पुगेको प्रदेश स्वास्थ्य निर्देशनालयले जनाएको छ ।

टिप्पणिहरु
Loading...