हिमाली आवाज । गण्डकी प्रदेशमा क्रियाशील पत्रकारहरुलाई सूचना प्रविधिको प्रयोग सम्बन्धी तालिम प्रदान गरिएको छ । प्रेस सेन्टर नेपाल गण्डकी प्रदेशले यही असार ७ र ८ गते दुई दिनको तालिम आयोजना गरेको हो । तालिममा गण्डकी प्रदेशका नौ जिल्लाका ४० जना सञ्चारकर्मीको सहभागिता थियो ।
गण्डकी प्रदेश मुख्यमन्त्री तथा मन्त्रीपरिषद् कार्यालयको सहयोगमा तालिम आयोजना गरिएको हो । तालिमको उद्घाटन समारोहमा पूर्व प्रतिनिधिसभा सदस्य हरिराज अधिकारीले जनपक्षीय पत्रकारितामा जोड दिर्दै समाज वर्गीय भएजस्तै पत्रकारिता पनि वर्गीय हुनुपर्नेमा जोड दिनुभयो । हुँदा खाने श्रमीक वा श्रमजीविको पक्षको पत्रकारिता नै वास्तविक पत्रकारिता भएको उहाँको भनाई छ ।
प्रेस सेन्टर नेपालका महासचिव सन्तोष पौडेलले श्रमजीविको पक्षमा गर्ने पत्रकारिता नै जनपक्षीय हुने दावी गर्दै वर्तमान् समयमा परिवर्तनका एजेण्डाको पक्षमा गरिएको पत्रकारिता नै जनपक्षीय भएको औँल्याउनुभयो ।
राष्ट्रिय समाचार समितिका वरिष्ठ उपसम्पादक रमेश लम्सालले सर्वस्वीकार्यता, तथ्यको अभाव, सूचना स्रोतको गोपनियतामा र रक्षा साथै प्रस्तुतिमा निखारता वर्तमान् अवस्थाका पत्रकारिता कर्मका चुनौति भएको केलाउँदै नागरिकका मुद्धालाई प्राथमिकता दिन सुझाव दिनुभयो । प्रशिक्षक लम्सालले विशेषगरी जलविद्युत पत्रकारिताका विविध पक्षका बारेमा प्रशिक्षण प्रदान गर्नुभयो ।
तालिममा पूर्व प्रतिनिधिसभा सदस्य अधिकारी, प्रेस सेन्टर नेपालका महासचिव पौडेल, राष्ट्रिय समाचार समितिका वरिष्ट उपसम्पादक लम्साल तथा पत्रकार सुनिल पाण्डेले सहजीकरण गर्नुभएको थियो ।
त्यस अवसरमा पछिल्लो पटक विकसित सूचना प्रविधि, पत्रकारिताको मूल उद्देश्य, समाचारको मूल्य, मिसन तथा व्यवसायिक पत्रकारिता, विकास तथा जलविद्युत् पत्रकारिताका विषयमा छलफल भयो।
