पोखरा शिक्षा, स्वास्थ्य र पर्यटनको राजधानी : मुख्यमन्त्री पोखरेल

हिमाली आवाज ।  गण्डकी प्रदेशका मुख्यमन्त्री कृष्णचन्द्र नेपाली पोखरेलले पोखरालाई शिक्षा, स्वास्थ्य र पर्यटनको राजधानी बनाउनुपर्ने बताउनुभएको छ । पोखराको काहुँमा निर्मित चरक इन्स्टिच्युट अफ हेल्थ साइन्स प्रालिको भवन बिहीबार उद्घाटनपछि मुख्यमन्त्री पोखरेलले यसका लागि प्रदेश सरकारले लगानीको वातावरण बनाइरहेको उल्लेख गर्नुभयो ।

प्रदेश समृद्धिको आधार पर्यटन नै भएकाले शिक्षा र स्वास्थ्यलाई पनि सँगै जोडन लैजान सकिने उहाँको भनाई छ ।  भौगोलिक हिसावले पोखरामा ठूला उद्योग र कलकारखाना स्थापनाको सम्भावना नभएकाले शिक्षा र स्वास्थ्यलाई नै जोड दिइएको मुख्यमन्त्री पोखरेलले बताउनुभयो ।  प्राकृतिक रुपमा सुन्दर, भौगोलिक रुपमा मनोरम पोखरामा स्वदेशका मात्र नभए विदेशका विद्यार्थी आकर्षित गर्ने गरी शैक्षिक संस्था सञ्चालनका लागि उहाँले निजी क्षेत्रसँग आग्रह गर्नुभयो ।

हाल पोखरामा २ वटा मेडिकल कलेज सञ्चालनमा रहेका र गण्डकी र पोखरा विश्वविद्यालय पनि मेडिकल कलेज चलाउने तयारीमा रहेकाले त्यसपछि विशेषज्ञ सेवाका लागि पनि पोखरा सक्षम हुने उहाँकोभ भनाई थियो ।  कोभिड महामारीका बेला चरक हस्पिटल, नर्सिङ कलेजजस्ता निजी संस्थाले अतुलनीय योगदान पु¥याएको भन्दै मुख्यमन्त्रीले प्रशंसा गर्नुभयो ।

प्रदेशका नागरिकलाई कोरोनाविरुद्धको खोप दिलाउनका लागि सरकार लागिरहेको भन्दै कास्की अब केही दिनमा पूर्ण खोपयुक्त हुन लागेको जानकारी दिनुभयो । उहाँले भन्नुभयो,‘अहिले १ लाख ४० हजार डोज खोप आएको छ, कास्कीमा खोप लगाउने तालिका पनि सार्वजनिक भइसकेको छ, १८ वर्ष उमेरमाथिका सबैले खोप पाउने निश्चित भइसकेको छ ।’

पूर्व स्वास्थ्य मन्त्री तथा प्रतिनिधि सभा सदस्य खगराज अधिकारीले स्वास्थ्य सेवालाई सहज बनाउन सरकारले धेरै काम गर्न बाँकी रहेको भनाइ राख्नुभयो ।

कार्यक्रममा स्वास्थ्य तथा जनसंख्या मन्त्री मधु अधिकारी गुरुङले नागरिकको स्वास्थ्यको अधिकार प्रत्याभूत गर्न सरकार सदा प्रतिबद्ध रहेको बताउँदै प्रदेश सरकारले सिमित स्रोत र साधनकाबीच पनि नागरिकले महसुस गर्ने गरी काम थालेको बताउनुभयो ।

कानुन, सञ्चार तथा प्रदेश सभा मामिला मन्त्री बिन्दुकुमार थापाले पोखराको सुन्दरताको अधिकतम प्रयोगका लागि जुनसुकै तरिका अपनाएर भए पनि पर्यटक भिœयाउनुपर्ने भनाइ राख्नुभयो ।

प्रदेश सभा सदस्य राजीव पहारीले निजी तबरबाट सञ्चालित शैक्षिक र स्वास्थ्य संस्थाहरुको योगदानको मूल्यांकन राज्यस्तरबाट हुन नसकेको बताउनुभयो । कार्यक्रममा निजी स्वास्थ्य संस्थाहरुको संगठन (अफिन) गण्डकी संयोजक अशोक पालिखेले सरकारले निजी नर्सिङ कलेजलाई मर्का पर्ने गरी गतिविधि गर्दै आएको राख्नुभयो ।  पोखरामा ५ र प्रदेशभर १४ नर्सिङ कलेज रहेको भन्दै उहाँले सिटिइभिटी र सरकारको प्रष्ट धारणा नआउँदा सञ्चालक र विद्यार्थी मर्कामा परेको बताउनुभयो ।

चरक इन्स्टिच्युट अफ हेल्थ साइन्स प्रालिका अध्यक्ष कपिल पोखरेलले पोखरामा शिक्षा र स्वास्थ्यको सम्भावना देखेर नै दक्ष जनशक्ति उत्पादनका लागि कलेज सञ्चालनमा ल्याइएको बताउनुभयो ।

कार्यक्रममा कलेजका सञ्चालन सञ्चालक टंक अधिकारी, सिटिइभिटी गण्डकी प्रमुख प्रमोद आचार्य, प्रदेश शिक्षा, संस्कृति, विज्ञान प्रविधि तथा सामाजिक विकास मन्त्रालयका सचिव विनोदबहादुर कुँवर, पोखरा विश्वविद्यालय स्वास्थ्य संकायका डिन डा. अमर नागिला लगायतले भनाइ राख्नुभयो ।  १६ वर्ष अघि पोखराको काहुँमा खुलेको नर्सिङ कलेज हाल चरक गु्रपले लिएर नयाँ व्यवस्थापनका साथ सञ्चालन हुँदै आएको छ ।

Comments
Loading...