हिमाली आवाज । पछिल्लो समय नेपालीहरुमा पनि जन्म दिन उत्सवका रुपमा मनाउने परम्परा बढेको छ । जन्म दिनमा साथीहरुबीच भेटघाट गर्ने र ठूला होटलहरुमा पार्टी गरेर मनाउने गरिन्छ । बाबु आमाले पनि आफ्ना छोराछोरीको जन्म दिन भव्य गरी विशेष रुपमा मनाउने गर्दछन् ।
तर पोखराका एक दम्पतीले भने छोराको जन्म दिनमा सामाजिक काम गरेका छन् । पोखरा–१३ निवासी मेडिकल व्यवसायी समेत रहनुभएका मणि न्यौपाने र संगीता बरालले आज छोरा बरदानमणिको पहिलो जन्म दिनमा स्वास्थ्य शिविर आयोजना गरेर मनाउनुभयो ।
उहाँहरुले पोखराको वडा न ं १०, १२ र १३ का गरिव तथा विपन्नहरुका लागि निःशुल्क सुगर र थाइराइड परीक्षणको व्यवस्था गर्नुभयो । सो शिविरबाट दुई सय बढीले सेवा लिएका छन् । धेरै खर्चिलो गरी उत्सव मनाउनुभन्दा फरक र सबैलाई हित हुने काम गर्ने सोच अनुसार स्वास्थ्य शिविर आयोजना गरेको मणि न्यौपानेले बताउनुभयो ।
उहाँले भन्नुभयो,“पहिलो सन्तानको रुपमा छोराको जन्म भएर पहिलो जन्म दिन मनाउदाँ हामी असाध्यै खुशी भयौँ । त्यो खुशीमा भोजभतेर गर्नुभन्दा प्रेमपूर्वक सबैलाइ सहयोग र सहकार्य गरौँ तथा सेवानै ठूलो कुरा हो भनेर स्वास्थ्य शिविर गरेका हौँ ।” न्यौपानेले यसअघि पनि विभिन्न सामाजिक काम गर्दै आउनुभएको छ ।
पोखरा महानगरपालिका वडा नं १३ का वडाध्यक्ष किरण बरालले न्यौपाने दम्पतीको कार्यप्रति खुशी व्यक्त गर्नुभयो ।उहाँले यस्ता सामाजिक कार्यको अन्यले पनि अनुसरण गर्नुपर्नेमा जोड दिनुभयो । मियापाटनस्थित अन्नपूर्ण क्लिनिकमा आयोजना गरिएको स्वास्थ्य शिविरमा युआरएल नेपालले प्राविधिक सहयोग गरेको थियो ।
