हिमाली आवाज । कालिका बहुमुखी क्याम्पस सञ्चालक समितिका संस्थापक अध्यक्ष उद्योगपति, समाजसेवी, शिक्षा सेवी सूर्यबहादुर केसीको सालिक अनावरण गरिएको छ।
पोखरा महानगर पालिका वडा नं. १४ काजी पोखरी स्थित कालिका बहुमुखी क्याम्पसको हाता भित्र केसीको अर्ध कदको सालिक अनावरण गरिएको हो । क्याम्पसको ३४ औँ वार्षिकोत्सव, भवन उद्घाटन सालिक अनावरण एवम् पुरस्कार वितरण कार्यक्रममा केसीको सालिक अनावरण गरिएको हो ।
क्याम्पस हात भित्र निर्माण गरिएको अर्ध कदको सालिकको त्रिभुवन विश्वविद्यालय व्यवस्थापन संकायका डिन प्रा.डा. महानन्द चालिसे, सुर्यप्रेम ट्रस्ट तथा कालिका बहुमुखी क्याम्पसका संरक्षक, सञ्चालक समितिका पूर्व अध्यक्ष स्वर्गीय केसीकी धर्मपत्नी प्रेमकुमारी केसी, क्याम्पस सञ्चालक समितिका अध्यक्ष केसीका छोरा किरण केसी, छोराहरू प्रकाश केसी र रोशन केसी, क्याम्पस प्रमुख सह प्राध्यापक विरञ्जी गौतमले शनिवार एक कार्यक्रमकाबिच संयुक्त रूपमा अनावरण गर्नुभयो ।
क्याम्पस स्थापना काल देखि नै शैक्षिक उन्नयन तथा भौतिक निर्माणमा पु¥याएको योगदानको उच्च कदर गर्दै उहाँको चिरकाल स्मरणका लागि क्याम्पस परिसरमा केसीको सालिक स्थापना गरिएका हो । केसीको पहलमा भौतिक निर्माण तथा शैक्षिक उन्नयनमा क्याम्पसले ठुलो फड्को मारेको थियो ।
कार्यक्रममा सहभागिले केसीलाई एउटा सामाजिक र सफल व्यावसायिक व्यक्तित्व तथा सहयोगी भावना भएको र अरूलाई सहयोग गर्न सधैँ तत्पर रहने व्यक्तिको रूपमा परिचर्चा गरेका थिए ।त्यसै अवसरमा स्व. कीर्तिबहादुर केसीको स्मृतिमा संस्थापक सञ्चालक समितिका अध्यक्ष स्व. सूर्यबहादुर के.सी. का परिवार बाट स्थापित सूर्यप्रेम ट्रस्टको आर्थिक सहयोगमा निर्माण गरिएको कीर्ति पुस्तकालय भवनको पनि उद्घाटन गरिएको थियो ।
उक्त भवनको त्रिभुवन विश्वविद्यालय व्यवस्थापन संकायका डिन प्रा.डा. महानन्द चालिसे, सुर्यप्रेम ट्रस्ट तथा कालिका बहुमुखी क्याम्पसका संरक्षक, सञ्चालक समितिका पूर्व अध्यक्ष स्वर्गीय केसीकी धर्मपत्नी प्रेमकुमारी केसी, क्याम्पस सञ्चालक समितिका अध्यक्ष केसीका छोरा किरण केसी, छोराहरू प्रकाश केसी र रोशन केसी, क्याम्पस प्रमुख सह प्राध्यापक विरञ्जी गौतमले संयुक्त रूपमा उद्घाटन गर्नुभयो । त्यस अवसरका उक्त भवन केसी परिवारले डिन प्रा.डा. चालिसेलाई र चालिसेले क्याम्पस प्रमुख गौतमलाई हस्तान्तरण गरेका गर्नुभयो । उक्त बहुउद्देश्यीय भवन निर्माणमा ३ करोड २६ लाख २८ हजार ५ सय २० रुपैयाँ लागत लागेको थियो ।
कार्यक्रममा बोल्दै प्रमुख अतिथि त्रिभुवन विश्वविद्यालय व्यवस्थापन संकायका डिन प्रा.डा. महानन्द चालिसेले क्याम्पस यो स्थानमा आउनका लागि स्व. सूर्यबहादुर केसीको भूमिका सधैँ स्मरणयोग्य भएको उल्लेख गर्नुभयो ।
‘क्याम्पसको हरेके क्षेत्र सबल रहनुमा केसीको भूमिका ठुलो रहेको छ’ उहाँले भन्नुभयो, उहाँकै पदचाप पछ्याएर उहाँका छोरा जुन युवा जोसका साथ क्याम्पस सञ्चालक समितिमा आउनुभयो शैक्षिक उन्नयनमा क्याम्पसका लागि यो सौभाग्य मिलेको छ ।’ उहाँले श्रम र उत्पादनसँग जोड्ने खालको शिक्षा अहिलेको आवश्यकता रहेको बताउनुभयो ।
क्याम्पस सञ्चालक समितिका अध्यक्ष किरण के.सी. ले आफ्ना बुबाको सम्मानमा क्याम्पस परिसर भित्र अर्ध कदको सालिक निर्माण गरेकोमा परिवारको तर्फबाट आभार व्यक्त गर्नुभयो । उहाँले क्याम्पसलाई समय सापेक्ष तरिकाले अगाडि बढाउनका लागि आफू सधैँ लागि पर्ने प्रतिबद्धता समेत जनाउनुभयो । निवर्तमान क्याम्पस प्रमुख रवीन्द्रनाथ बास्तोलाले क्याम्पसमा स्व. सूर्यबहादुर केसीको योगदान अनुकरणीय रहेको बताउनुभयो ।
उक्त अवसरमा क्याम्पसका अभिभावक डम्बर कुमारी गुरुङ र छोरा मोहन गुरुङले डम्बर मोहन गरिब छात्रवृत्ति अक्षयकोषका लागि २ लाख ५१ हजार रुपैयाँ क्याम्पस प्रमुख गौतमलाई हस्तान्तरण गर्नुभयो ।
उक्त कार्यक्रममा क्याम्पसका पूर्व क्याम्पस प्रमुख बालकृष्ण शर्मा, जनप्रकाश बहुमुखी क्याम्पसका क्याम्पस प्रमुख ऋषिराम बुढाथोकी, क्याम्पस प्रमुख सह प्राध्यापक विरञ्जी गौतम, क्याम्पसका सिनेटर तथा पूर्व प्रहरी वरिष्ठ उपरीक्षक कृष्णबहादुर थापा, कल्याणकारी समितिका सचिव तेजेन्द्र केसी लगायतले भनाई राख्नुभयो । कार्यक्रममा विभिन्न विधामा पुरस्कार वितरण गर्नुको साथै सांस्कृतिक कार्यक्रम प्रस्तुत गरिएको थियो ।
क्याम्पस सञ्चालक समितिका अध्यक्ष किरण केसीको अध्यक्षतामा भएको उक्त कार्यक्रममा उपाध्यक्ष तथा वडा नं. १४ का वडा अध्यक्ष बोधबहादुर कार्कीले स्वागत र सहायक क्याम्पस प्रमुख सालिकराम तिम्सिनाले कार्यक्रम सञ्चालन गर्नुभयो ।
