हिमाली आवाज । कास्की जिल्लाको माछापुच्छ«े गाउँपालिकामा अवस्थित मर्दी हिमाल पदयात्राका क्रममा गत पुस १४ गतेदेखी हराएका एक जना विदेशी पर्यटक अहिलेसम्म फेला पर्न सकेका छैनन् ।
स्विडेनका २० वर्षीय मिचल लिउ ब्लोम्बर्ग पदयात्राका क्रममा मर्दीको हाइक्याम्पबाट बेपत्ता भएको पाँच दिन व्यतित हुँदा समेत खोजी र उद्धारमा जुटेको टोलीले उहाँको बारेमा केही जानकारी प्राप्त गर्न सकेको छैन ।
पर्यटक हराएको भोलीपल्टदेखीनै खोजीमा सुरक्षाकर्मी, माछापुच्छ«े गाउँपालिका, पर्यटन व्यवसायी तथा अन्नपूर्ण संरक्षण क्षेत्र आयोजनाबाट खोजीकर्ता परिचालन भएपनि अवस्था थाहा हुन नसकेको प्रहरीले जनाएको छ ।
पदमार्गको हाइ क्याम्पको होटल म्याजिक माउन्टेनमा शुक्रबार बास बसेर शनिबार विहान ४ बजे पानी र टर्चलाइटमात्र लिएर मर्दी आधार शिविरतर्फ जानु भएका मिचलको त्यसपछि अवस्था अज्ञात छ ।
उहाँले आफ्नो झोला लगायतका सामग्रीहरु होटलमै छाडेर जानुभएको स्थानीय व्यवसायीको भनाई छ । मर्दीको हाइक्याम्पबाट माथि अन्य होटल तथा रेष्टुरेन्टहरु छैनन् । हाइक्याम्पबाट चार घण्टाको हिँडाईपछि मर्दी बेसक्याम्प पुगिन्छ ।
जिल्ला प्रहरी कार्यालयका प्रवक्ता एवं प्रहरी नायब उपरीक्षक श्रवणकुमार विकले प्रहरीले सम्पर्क विहीन पर्यटकको खोजी गरेपनि अवस्था थाहा हुन नसकेको बताउनुभयो ।
“पर्यटक हराएको सूचना लगत्तै स्थानीय प्रहरी तथा पोखराबाट समेत प्रहरी टोली गएर खोजी कार्यलाई निरन्तरता दिएका छौँ ।”विकले भन्नुभयो,“फेला पर्न सक्ने सम्भावना भएका सबै ठाउँमा खोजी गरेपनि अवस्था अहिलेसम्म थाहा हुन सकेको छैन ।”
मर्दी हिमाल पर्यटन व्यवस्थापन समितिका सचिव प्रदीप गौतमले चार हजार ८०० मिटर उचाईको मर्दीको ‘अपरबेसक्याप’सम्म पुगेर खोजी गरिएको जानकारी दिनुभयो ।
हिउँ परिरहेको र अप्ठ्यारो बाटोका कारण खोजीमा समस्या भएको उहाँले बताउनुभयो । गौतमले हेलिकप्टरबाट खोजी र उद्धारका लागि पहल भइरहेको जानकारी दिनुभयो ।
