त्यस्तै, कास्की क्षेत्र नम्बर १ मा नेकपामा उम्मेदवार राजकाजी गुरुङले घरदैलो र भेटघाट जारी राखेका छन् । सो क्षेत्रमा नेकपाले विहीबार चुनावी प्रचारप्रसार तथा घर दैलो अभियान अन्र्तगत पोखरा–२६ मा सम्पर्क कार्यालय स्थापना गर्ने जनाइएको छ । कास्की १ का उम्मेदवार राजकाजी गुरुङसहितको टोलीले घरदैलो र भेटघाटलाई पनि निरन्तरता दिइरहेको सो क्षेत्रका चुनावी कमाण्डर सोमती गुरुङले जानकारी दिईन् ।

कास्की २ का उम्मेदवार किरण थापा (आमोद) बुधबार पनि घरदैलो कार्यक्रममा व्यस्त भए । पोखरा–२० भलामको ठकुरी टोल भलाम एरिया, डाँडागाउँ, भण्डारीथर हँुदै वडा कार्यालयसम्मको क्षेत्रमा घरदैलो कार्यक्रममा उनले जनतासंग भेटघाट र उनीहरुका सुझाव समेत संकलन गरेका छन् । जनताको सुझाव अनुसार नै विकासको खाका बनाउने योजना अन्तर्गत सुझाव संकलन गरेको सो क्षेत्रका चुनावी कमाण्डर खड्क हमालले जानकारी दिए । सो अवसरमा स्थानियले महानगरमा भएपनि पोखरा–२० विकासको मामलामा वत्ती मुनिको अँधेरोमा परेको भन्दै अब नेकपाबाट मात्रै आशा बाँकी रहेको बताए । मूलबाटोचाहिं पिच भएको तर घर जानेबाटोचाहिं जोखिमपूर्ण रहेको भन्दै लक्ष्मी सुनारले भनिन्,‘कतिबेला दुर्घटना हुने हो भन्ने पीर हुन्छ । हामी त पोखरामा भएर पनि विकासमा पछि परेको कर्णालीजस्तो भयौं । अब त तपाईंहरुको मात्रै आशा बाँकी रह्यो ।’

स्थानिय लक्ष्मी सुनारले २७ घर रहेको दलित बस्तीमा पानी र सडकको समस्या रहेको उनले सुनाईन् ।