हिमाली आवाज । आन्तरिक राजश्व कार्यालय पोखराले गत आर्थिक वर्ष २०७८÷०७९ मा लक्ष्यको ९५ दशमलव ६६ प्रतिशत मात्र राजश्व सङ्कलन गरेको छ ।
विशेषगरी पर्यटन क्षेत्रबाट राम्रो राजश्व उठाउँदै आएको कार्यालयको पर्यटन व्यवसाय कोभिडअघिकै लयमा फर्किन नसक्दा राजश्वको लक्ष्य समेत प्रभावित भएको हो ।
गत आवमा कूल रु पाँच अर्ब १० करोड १७ लाख २८ हजार राजश्व सङ्कलनको लक्ष्य राखेको कार्यालयले रु चार अर्ब ८८ करोड चार लाख ४१ हजार मात्र सङ्कलन गर्न सफल भयो । सङ्कलित राजश्व लक्ष्यको रु २२ करोड १२ लाख ८७ हजार न्यून हो ।
कार्यालयले आयकरतर्फ लक्ष्य भन्दा बढी राजश्व सङ्कलन गरेपनि मूल्य अभिवृद्धि कर(मुअकर) र अन्त शुल्क लक्ष्य अनुसार सङ्कलन नहुँदा समग्र राजश्वको लक्ष्य पूरा हुन नसकेको हो ।
कार्यालयले आयकर शीर्षकमा रु दुई अर्ब ८४ करोड एक लाख २१ हजार सङ्कलनको लक्ष्य राखेकामा रु तीन अर्ब तीन करोड ५६ लाख जम्मा भएको कार्यालयले जनााएको छ । जुल लक्ष्यको १०६ दशमलव ८८ प्रतिशत हो ।
यसैगरी मुअकरमा रु एक अर्ब ५७ करोड १० लाख ७८ हजारको लक्ष्य राखिएकामा रु एक अर्ब ३३ करोड ५५ लाख ४२ हजार सङ्कलन भएको प्रमुख कर अधिकृत एवं राजश्व कार्यालयका प्रमुख एवं प्रमुख कर अधिकृत रमेश शर्माले बताउनुभयो ।
कार्यालयले गत आर्थिक वर्षमा घरबहाल करतर्फ रु छ करोड ३९ लाख ३४ हजार, ब्याजकर रु ३५ करोड ३५ लाख १६ हजार, अन्तशुल्क रु १८ करोड ९७ लाख ५२ हजार, स्वास्थ्य सेवा कर रु १६ लाख ४१ हजार र शिक्षा कर रु चार लाख ३४ हजार सङ्कलन गरेको छ ।
कार्यालयले भने लक्ष्य पूरा हुन नसकेपनि राजश्व सङ्कलन सन्तोषजनकनै रहेको जनाएको छ । विगतको राजश्वको वार्षिक वृृद्धि दर भन्दा कम भएपनि राष्ट्रिय औसतभन्दा माथि रहेकाले राम्रोनै मान्नुपर्ने कार्यालय प्रमुख शर्माले बताउनुभयो ।
कार्यालयको कार्यक्षेत्रमा सेवा क्षेत्र बढी रहेको र होटल तथा पर्यटन क्षेत्र कोभिड अघिकै लयमा फर्किन नसक्दा त्यस क्षेत्रबाट जम्मा हुने मुल्यअभिवृद्धि करमा कमी आएको र सरकारी कार्यालयको पूँजीगत खर्च कम हुँदा समेत राजश्वको समग्र लक्ष्य भेट्टाउन नसकिएको कार्यालयले जनाएको छ ।
कार्यालय प्रमुख शर्माले भन्नुभयो,“ हाम्रो कार्यालयको कार्यक्षेत्रमा सेवा क्षेत्र बढी छ । होटल र पर्यटन क्षेत्र पुरानै लयमा फर्किन नसक्दा सो क्षेत्रबाट भ्याट आउन सकेन, पोखरा महानगरपालिका र प्रदेशस्थित कार्यालयबाट पनि गत वर्ष पूँजीगत खर्च कम हुँदा सरकारी कार्यालयबाट आउनुपर्ने मुअकर पनि सोचेअनुसार आउन नसक्दा हामीले लक्ष्य हासिल गर्न सकेनौँ । ”
आन्तरिक राजश्व कार्यालय पोखरामा गत असार मसान्तसम्म ६२ हजार ४७१ आयकरमा र ११ हजार ७१२ करदाता मुल्यअभिवृद्धि करमा दर्ता भएका छन् । यसैगरी व्यक्तिगत स्थायी लेखा नम्बर लिने करदाताहरुको सङ्ख्या एक लाख ३० हजार ८७० रहेको कार्यालयका सूचना अधिकारी मदनबहादुर केसीले जानकारी दिनुभयो ।
गत आर्थिक वर्ष २०७८÷०७९ मा आयकरतर्फ सात हजार ४६६, मूअकरमा एक हजार ३५ र व्यक्तिगत स्थायी लेखा नम्बर लिने २२ हजार ५८३ करदाता थपिएका छन् ।