–कृष्ण दवाडी
हिमाली आवाज । नवौँ राष्ट्रिय खेलकुद प्रतियोगिता अन्तर्गत आइतबार पोखरा रङ्गशालामा एथलेटिक्स खेलको चार सय मिटर हडल्स दौड विधामा जयरानी थारुले स्वर्ण पदक जित्नुभयो ।
नेपाली सेनामा आवद्ध उहाँले खेलमा निर्धारित दूरी एक मिनेट ०४.१३ सेकेण्डमा पूरा गरेर स्वर्ण पदक मात्र आफ्नो पोल्टामा पार्नुभएन तीन महिनाअघिको आफ्नो नाममा रहेको राष्ट्रिय कीर्तिमान समेत सुधार गर्नुभयो ।
थारुले गएको असारमा काठमाडौंमा सम्पन्न ४४ औं राष्ट्रिय एथलेटिक्स प्रतियोगितामा एक मिनेट ०७.०२ सेकेण्डमा सो विधामा आठ वर्षअघिको पुरारो कीर्तिमान तोडेर आफ्नो नाममा लेखाउन सफल हुनुभएको थियो ।
जयरानी नवौँको प्रतिस्पर्धामा सहभागी हुन पोखरा आउनु अगावै कीर्तिमान सुधारको लक्ष्य राखेको बताउनुभयो । आफ्नो विधामा खेलमा प्रतिस्पर्धा कम हुने भएकाले समेत उहाँले सुधार गर्ने लक्ष्य राखेको बताउनुहुन्छ । उहाँले भन्नुभयो,“कीर्तिमान सुधार गर्दा धेरैनै खुःशी छु । आफूले सोचेको भन्दा राम्रो खेल भयो । टार्गेटनै मेरो रेकर्ड राख्ने थियो, त्यसमा सफल भएँ ।”
राष्ट्रिय खेलकुदमा पहिलो पटक स्वर्ण पदक जितेपछि उहाँले पोखरा रंगशालाबाट बर्दिया घरमा रहनुभएका आमा सुगही थारुलाई फोन गरेर आफ्नो सफलता सुनाउनुभयो । आमाले बधाई भन्दै अझै राम्रो गर छोरी भनेर हौसला दिएको जयरानीले बताउनुभयो ।
“बुबा घरमा हुनुहुँदे रैनछ आमालाई फोनमा स्वर्ण जितेँ भन्दा बधाई छ छोरी अझै राम्रो गर्न सक्छौँ भनेर हौसला दिनुभयो ।” थारुले भन्नुभयो ।
राष्ट्रिय खेलकुदमा सफलता मिलेपछि उहाँको अबको लक्ष्य अन्तर्राष्ट्रिय प्रतियोगिता खेल्ने र देशलाई पदक दिलाउने छ । “स्वर्ण पदक जित्ने लक्ष्य पूरा भएको छ । अब अन्तर्राष्ट्रिय प्रतियोगिताहरुमा अझै राम्रो गर्ने र देशलाई पदक दिलाउने मेरा लक्ष्य छ ।” उहाँले भन्नुभयो ।
जयरानीले विसं २०७२ देखी खेल्न थाल्नुभएको हो । त्यसअगाडि विद्यालयस्तरीय प्रतियोगिता, राष्ट्रपति रनिङ शिल्ड लगायतका जिल्ला तथा राष्ट्रिय प्रतियोगिता खेल्नुभयो । सातौँ राष्ट्रिय खेलकुदमा पहिलो पटक सहभागी उहाँले आठौँमा तत्कालीन प्रदेश नं ५ र हालको लुम्बिनी प्रदेशबाट सहभागी भएर तीन वटा इभेन्टमा रजत पदक जित्नुभयो ।
आठौँमा नेपाली सेनासँग प्रतिस्पर्धा गरेर द्धितीय हुनुभएका जयरानीले नवौँमा आर्मीबाट खेल्दै स्वर्ण जित्ने अवसर उहाँलाई मिल्यो । उहाँ विसं २०७६ साउनमा सेनामा भर्ना हुनुभयो ।
गाउँले दाई जीवन चौधरी जो आफू पनि खेल्नुहुन्थ्यो उहाँलेनै जयरानीलाई सेनामा प्रवेश गराउन सहयोग गरेको जयरानीको भनाई छ । आफूलाई खेल जीवनमा प्रवेश गराउन घरबाट बुबा भगवान डिन थारुको धेरैनै साथ र सहयोग मिलेको जयरानीले बताउनुभयो ।
सामान्य कृषक परिवारका जयरानीलाई आमाले घरको काम गर्नुपर्दछ भन्ने गरेपनि बुबाले खेलमै लाग्न प्रेरित गर्ने गरेको सुनाउनुभयो । उहाँले विगतलाई स्मरण गर्दै भन्नुभयो,“सानोमा आमाले घरको काम कसले गर्छ घरको काममा सहयोग गर्नुपर्दछ भन्नुहुन्यो, बाबा चाँही खेल खेल्नुपर्दछ भनेर मलाई अघि बढ्न प्रेरणा दिइरहुनभयो, बुबा कृषक भएपनि खेलकुदलाई मन पराउनुहुन्थ्यो ।”
सुरुमा चाँही उहाँलाई खेलमा लाग्न सहयोग गर्ने कोही नभएपनि पछि विद्यालयमा राम्रो गरेपछि विद्यालयमै निःशुल्क बस्ने र खेल्ने वातावरण मिल्यो ।
जयरानीले गुरुआमा मान्ने सुमित्रा चौधरी जो बर्दियाकै हुनुहुन्छ र अहिले एथलेटिक्स प्रशिक्षक समेत हुनुहुन्छ उहाँले विद्यालयमा होस्टलमा बस्ने देखी खेलकुदका प्रतियोगिताहरुमा सहभागी हुनका लागि सहयोग गरेको थारुले सुनाउनुभयो ।
उहाँले भन्नुभयो,“मलाई खेलमा पाइला टेकाउने सुमित्रा चौधरी गुरुआमाले हो । उहाँको साथ, सहयोग मलाई जहिले पनि मिलिरहेको छ ।”
