हिमाली आवाज । लेखनाथ उद्योग वाणिज्य संघको अध्यक्षमा बिनोद श्रेष्ठ विजयी हुनुभएको छ । संघको २७ औं वार्षिक साधारण सभा तथा १४ औं अधिवेशनमा निकटतम प्रतिद्धन्दी भरतकुमार अधिकारीलाई ९४ मतले पछि पार्दै श्रेष्ठ विजयी हुनुभयो ।
अध्यक्षमा निर्वाचित विजयी श्रेष्ठले खसेको कुल १ हजार ७ सय ११ मतमध्ये ८ सय ८१ मत प्राप्त गर्नुभयो । अधिकारीले ७ सय ८७ मत पाउनुभयो । यस्तै वरिष्ठ उपाध्यक्ष पदमा राजेन्द्र ओझाले २ सय ८० को फराकिलो मतान्तरले उहाँ प्रतिष्पर्धी ऋषिराम जमरकट्टेललाई पराजित गर्नुभयो । ओझाले ९ सय ७० मत प्राप्त गर्दा जमरकट्टेलले ६ सय ९० मत प्राप्त गर्नुभयो ।

प्रथम उपाध्यक्षमा ८ सय ९६ मतका साथ उपेन्द्रराज सुवेदी(राजु) विजयी हुनुभयो ।े गोपिचन्द्र बाँस्तोलाले ७ सय ७४ मत प्राप्त गर्नुभयो । संघको द्धित्तीय उपाध्यक्ष पदमा विक्रम कर्माचार्यले ६ मतको झिनो अन्तरले प्रतिष्पर्धी मेनुका श्रेष्ठलाई पराजित गर्नुभयो । कर्माचार्यले ८ सय ३७ मत प्राप्त गर्दा श्रेष्ठले ८ सय ३१ मत प्राप्त ल्याउनुभयो । महासचिव पदमा जानुका अधिकारी पराजुली विजयी हुनुभयो ।
उहाँले प्रतिद्धन्दी जिवन तिवारीलाई पछि पार्नुभयो । पराजुलीले ९ सय २९ मत ल्याउँदा तिवारीले ७ सय मत प्राप्त गर्नुभयो । यस्तै उप–महासचिव पदमा भरतराज ओझा र कोषाध्यक्षमा ध्रुव बाबु भट्टराई विजयी हुनुभएको छ ।