हिमाली आवाज । पोखरा महानगरपालिकाको १७ औँ नगरसभा शुभारम्भ भएको छ । नगरसभामा नगर प्रमुख धनराज आचार्यले आगामी आर्थिक वर्ष २०८२।०८३ को नीति तथा कार्यक्रम प्रस्तुत गर्नुभएको छ, उपप्रमुख मन्जुदेवी गुरुङले बजेट तथा कार्यक्रम प्रस्तुत गर्नुभएको छ ।
विकास गतिविधिलाई व्यवस्थित रूपमा सञ्चालन गर्न, निर्वाचनको समयमा गरेका प्रतिविद्धतालाई नतिजामा परिणत गर्दै नागरिकको विश्वास आर्जन गरी समुन्नत पर्यटकीय पोखरा निर्माणको दीर्घकालीन लक्ष्य हासिल गर्ने लक्ष्यका साथ प्रस्तुत नीति तथा कार्यक्रमको कार्यान्वयनका लागि आागामी वर्ष रु ८ अरब ३५ करोड १२ लाखको बजेट सभामा प्रस्तुत गरिएको हो ।
सङ्घीय सरकारको सशर्त अनुदानबाट रु.३ अरब १३ करोड १२ लाख अर्थात् ३७.४९ प्रतिशत र आन्तरिक आयबाट रु.५ अरब २२ करोड अर्थात् ६२.५१ प्रतिशत व्यहोर्ने गरी महानगरपालिकाले बजेट ल्याएको हो ।
बजेटमा पूर्वाधारतर्फ २ अर्ब ३३ करोड रुपैयाँ विनियोजन गरिएको छ । सामाजिक विकासतर्फ ३८ करोड, आर्थिक विकासतर्फ १८ करोड, वडा कार्यालयतर्फ १ अर्ब, शहरी विकास पर्यटन वन तथा वातावरणतर्फ ३८ करोड रुपैयाँ बजेट प्रस्ताव गरिएको छ। स्वास्थ्य सेवामा ३१ करोड २ लाख रुपैयाँ, शिक्षातर्फ १ अर्ब ७३ करोड ३३ लाख ५१ हजार रुपैयाँ छुट्टाइएको हो।
