हिमाली आवाज । पोखराको स्थानीय यातायात प्रालिको छैटौँ साधारणसभा शुक्रबार सम्पन्न भएको । प्रालिका अध्यक्ष केदार पौडेलको अध्यक्षता र नेपाल यातायात व्यवसायी राष्ट्रिय महासंघका अध्यक्ष बिजयबहादुर स्वाँरको प्रमुख आतिथ्यतामा सम्पन्न सभाले यातायात व्यवसायलाई प्रविधिमैत्री र समयानुकल परिर्वतनको पक्षमा आवाज उठाएका छन्।
कार्यक्रममा प्रमुख अतिथि स्वाँरले सेवामा प्रतिस्पर्धा गर्न व्यवसायीलाई आग्रह गर्नुभयो । “हामी यातायात व्यवसायी पनि समयअनुसार परिर्वतन हुनुपर्दछ । अब सेवामा प्रतिस्पर्धा गरौँ । प्रविधिलाई अनुसरण गरौँ, त्यसो भयो भने व्यवसाय सुरक्षित हुन्छ । ”
अध्यक्ष स्वाँरले यातायात व्यवसायीलाई प्रयोग गरेर राजनीतिक दलहरुले दुनो सोझ्याएको तर यातायात व्यवसायीका समस्या समाधानका लागि भने काम नगरेको बताउनुभयो ।
महासंघका बरिष्ठ उपाध्यक्ष पून्यप्रसाद सिटौला (सरोज)ले आगामी चुनावमा दलहरुले यातायात क्षेत्रलाई नजरअन्दाज गरे त्यसको परिणाम नराम्रो हुने चेतावनी दिनुभयो । सम्बन्धित क्षेत्रको व्यक्ति उच्च ओहोदामा पुगेमात्र सो क्षेत्र सबलीकरण हुने भएकाले पार्टी र सरकारमा यातायात क्षेत्रकालाई पनि समेट्नुपर्नेमा जोड दिनुभयो ।
महासंघका बरिष्ठ उपाध्यक्ष एवं पृथ्वी राजमार्ग बस सञ्चालक कम्पनी प्रालिका अध्यक्ष ऐनकुमार साईले महासंघका नेताहरु कुर्सीका लागि मरिहत्ते गर्ने तर सार्वजनिक यातायातका समस्या समाधानमा भने गम्भीर नहुँदा समस्या ज्यूँका त्यूँ रहेको आरोप लगाउनुभयो ।
स्थानीय यातायात प्रालिका अध्यक्ष केदार पौडेलले सार्वजनिक यातायात ऐन नया नआउँदा यातायात व्यवसायीले शास्ती भोग्नुपरेको बताउनुभयो । उहाँले समिति हुँदा भएको आफ्नै सम्पत्ति पनि आफ्नो नाममा ल्याउन नपाउनु विडम्वना भएको बताउनुभयो । उहाँले यातायात व्यवसायीकाबीचमा एकता र व्यवसायमा स्वस्थ प्रतिस्पर्धामा जोड दिनुभये ।
साधारणसभाका अवसरमा महासंघका केन्द्रीय सचिव भानुभक्त बराल, कास्की अध्यक्ष योगेन्द्रबहादुर केसी, मजदुर नेता तीलक विश्वकर्मा, स्थानीय यातायात प्रालिका प्रवन्धक रामचन्द्र शर्मा लगायतले यातायात क्षेत्रका समस्या समाधानका लागि नेतृत्वले पहलकदमी लिनुपर्नेमा जोड दिनुभयो ।
