हिमाली आवाज । पोखरामा सञ्चालन भएको छैटौं संस्करणको टाइगर कप राष्ट्रिय तथा अन्तर्राष्ट्रिय आमन्त्रित क्लब च्याम्पियनसिप भलिबलको पुरुषतर्फको उपाधि गण्डकी प्रदेश भलिबल संघले जितेको छ ।
पोखरा रंगशालास्थित भलिबल कोर्टमा आज सम्पन्न फाइनल खेलमा विभागीय टोली नेपाल पुलिस क्लबलाई ३–१ को सेटमा पराजित गरेर गण्डकी च्याम्पियन बन्यो ।पहिलो सेट २३–२५ ले गुमाएको गण्डकीले त्यसपछिका तीन सेटमा पुनरामगन जित निकाल्दै उपाधि जित्न सफभ यो ।
गण्डकीले दोस्रो सेट २८–२६, तेस्रो सेट २५–२२ र चौथो सेट २५–१७ ले जित निकाल्यो । यससँगै अघिल्लो संस्करणको फाइनलमा पुलिससँग बेर्होरेको हारको बदला समेत गण्डकीले लिन सफल भयो ।
च्याम्पियन बनेको गण्डकीले ट्रफी सहित रु छ लाख ६६ हजार ६६६ पायो । उपविजेता पुलिसले रु तीन लाख ६६ हजार ६६६ मा चित्त बुझायो ।
यसैगरी प्रतियोगितामा तेस्रो भएको पर्वत जिल्ला भलिबल संघले रु दुई लाख छ हजार ६६६ पायो । तेस्रो स्थानका लागि भएको खेलमा पर्वत भलिबलले त्रिभुवन आर्मी क्लबलाई ३–० को सोझो सेटमा पराजित गरेको थियो ।प्रतियोगितामा गण्डकीका मुस्ताफा खान सर्वाेत्कृष्ट खेलाडी घोषित हुँदै रु २६ हजार ६६६ पाउनुभयो ।
यसैगरी उत्कृष्ट सर्भर गण्डकीका अद्नान खान, लिविरो नेपाल पुलिसका भीमबहादुर गाहा, सेटर गण्डकीका बलराम गुरुङ, ब्लकर गण्डकीका फहद राज, स्पाइकर पर्वत भलिबल संघका फकर वाट्टु, प्रशिक्षक गण्डकीका रमेश केसी घोषित हुनुभयो । उहाँहरुले जनही रु ११ हजार १११ पाउनुभयो ।
विजेता टोली तथा विधागत रुपमा उत्कृष्ट खेलाडीहरुलाई पोखरा महानगर प्रमुख धनराज आचार्य, नेपाल भलिबल संघका अध्यक्ष जितेन्द्रबहादुर चन्द, आयोजक टाइगर ग्रुपका अध्यक्ष नारायण शर्मा लगायतले पुरस्कार वितरण गर्नुभयो ।
यसअघि शुक्रबार सम्पन्न महिलातर्फको फाइनल खेलमा उपाधि न्यू डायमण्ड स्पोर्ट्स क्लबले जितेको थियो । जसमा नेपाल पुलिस क्लब उपविजेता र थाइल्याण्ड क्विन्स तेस्रो बने ।
टाइगर ग्रुप अफ पोखरा नेपालको आयोजनामा माघ ९ गतेदेखि सुरु भएको च्याम्पियनसिपमा पुरुषतर्फ ६ र महिलातर्फ ५ टोली सहभागी भएका थिए ।
