हिमाली आवाज । पोखरामा आयोजना हुने ‘मुख्यमन्त्री कप गण्डकी प्रदेशस्तरीय महिला तथा पुरुष भलिबल प्रतियोगिता’को तयारी पूरा भएकोे छ ।
कास्की जिल्ला भलिबल सङ्घको आयोजनामा यही फागुन ४ देखी ८ गतेसम्म पोखरा रङ्गशालामा सञ्चालन हुने प्रतियोगिताको सबै तयारी सकिएको आज आयोजित पत्रकार सम्मेलनमा सङ्घका अध्यक्ष भीम पराजुलीले जानकारी दिनुभयो ।
उहाँका अनुसार प्रतियोगिताको तयारी पूरा भएको र मनाङ बाहेक गण्डकीका १० जिल्लाबाट महिला तथा पुरुष दुबै टोलीले सहभागिता जनाउने छन् । मनाङबाट भने चिसोका कारणले खेलाडी उपलव्ध हुन नसकेका कारण टिम दर्ता नभएको बताइन्छ ।
भलिबल खेलका माध्यमबाट गण्डकी प्रदेशलाई ‘खेलकूदको हब’का रुपमा विकास गर्ने, उत्कृष्ट खेलाडी पहिचान गरी राष्ट्रिय तथा अन्तर्राष्ट्रिय प्रतियोगितामा सहभागिता जनाउने र आसन्न नवौँ राष्ट्रिय खेलकूदका लागि उत्कृष्ट खेलाडी छनोट गरी बन्द प्रशिक्षणमा कम्तिमा एक महिना राखी प्रदेशको उत्कृष्ट टोली तयार गर्ने उद्धेश्यले प्रतियोगिता आयोजना गरिएको सङ्घले जनाएको छ ।
‘लिग कप नकआउट’का आधारमा सञ्चालन गरिने प्रतियोगिताको विजेता महिला र पुरुष दुबै टोलीले समान रु दुई लाख सहित मेडल र प्रमाणपत्र पुरस्कार प्राप्त गर्नेछन् भने उपविजेताले रु एक लाख पुरस्कार प्राप्त गर्ने प्रतियोगिता संयोजक खगेन्द्र गौचनले जानकारी दिनुभयो।
यसैगरी तृतीय टोलीले रु ५० हजारका दरले पुरस्कार प्राप्त गर्नेछन् । प्रतियोगितामा उत्कृष्ट हुने महिला तथा पुरुष खेलाडीले नगद रु पाँच÷पाँच हजार तथा उत्कृष्ट ‘सेटर’, ‘डिफेण्डर’, ‘स्पाइकर’ र ‘लिफ्टर’ले जनही रु पाँच हजारका दरले पुरस्कार पाउने छन् ।
पत्रकार सम्मेलनमा राष्ट्रिय खेलकूद परिषद्का सदस्यसचिव रमेशकुमार सिलवालले गण्डकी प्रदेशमा तय भएको नवौँ राष्ट्रिय खेलकूदको नयाँ मिति देशको राजनीतिक परिस्थितिको आकलनपछि घोषणा गरिने बताउनुभएको छ ।
आगामी वर्ष मङ्सिर वा फागुन महिनामा राष्ट्रिय खेलकूद आयोेजना गरिने जानकारी दिँदैै विसं २०७८ भित्रमा आयोजना गरिने उहाँले स्पष्ट पार्नुभयो ।
“हामी मुलुकको स्थिति हेर्देछौँ, सर्वोच्च अदालतको फैसला पनि कुरेका छौँ । सर्वोच्चले वैशाख १७ र २७ मा चुनाव हुन्छ भन्छ की संसद् पुनःस्थापना गर्छ ।”सदस्य सचिव सिलवालले भन्नुभयो,“ अर्को वर्ष स्थानीय तहको समेत निर्वाचन हुने भएकाले सरसल्लाह गरेर चुनावसँग नजुध्ने गरी राष्ट्रिय खेलकूदको मिति घोषणा गछौँ ।”