आहा ! रारा गोल्डकप शनिबारदेखी, सर्वोत्कृष्ट राष्ट्रिय खेलाडी सम्मान अभिशेकलाई

हिमाली आवाज । मोेफसलको प्रतिष्ठित ‘राष्ट्रिय तथा अन्तर्राष्ट्रिय अन्तर क्लब स्तरीय आमन्त्रित आहा ! रारा गोल्ड कप फुटबल प्रतियोगिता’ चैत २१ गते शनिबारदेखी शुरु हुने भएको छ ।आयोजक सहारा क्लब पोखराले आज पत्रकार सम्मेलन आयोजना गरी प्रतियोगिताको सम्पूर्ण तयारी पूरा भएको जनाएको छ ।

‘खेलकूदको विकासमा सहकार्य गरौँ, पोखरालाई खेलकूद पर्यटन शहरको रुपमा स्थापित गरौैँ’ भन्ने उद्धेश्य सहित आयोजना गरिएको प्रतितयोेगितामा एक विदेशी सहित आठ टोलीले उपाधिका लागि प्रतिस्पर्धा गर्ने क्लबका अध्यक्ष केशवबहादुर थापाले बताउनुभयो ।
उहाँका अनुसार प्रतियोगिताको उद्घाटन खेल शनिबार आयोजक सहारा क्लब पोखरा र सशस्त्र प्रहरीको एपिएफ क्लबकाबीचमा हुनेछ ।

प्रतियोगितामा सहारा र एपिएफसहित नेपालका ‘ए’ डिभिजनका क्लबहरु मनाङ मस्र्याङदी, नेपाल पुलिस क्लब, रुस्लान थ्रीस्टार,सङ्कटा क्लब र मछिन्द्र क्लबले उपाधिकाले लागि प्रतिस्पर्धा गर्नेछन् । विदेशी टोली अफ्रिकन रुट एशोएशन, डउला क्यामरुन सहभागी हुनेछ ।प्रतियोगिताको विजेता टोलीले रु १० लाख एक हजार तथा उपविजेताले रु पाँच लाख एक हजार सहित ट्रफी पुरस्कार प्राप्त गर्नेछन् ।

यसैगरी यसवर्षदेखी राजनीतिज्ञ एवं उद्योगपति सूर्यबहादुर केसीको स्मृतिमा प्रतियोगिताका उत्कृष्ट गोलकिपर, डिफेण्डर, मिडफिल्डर, स्ट्राइकर र प्रशिक्षकलाई जनही रु २५ हजार नगद सहित पुरस्कृत गरिने क्लबका महासचिव रामजीप्रसाद अधिकारीले जानकारी दिनुभयो ।
सर्वाेत्कृष्ट राष्ट्रिय फुटबल खेलाडी सम्मान अभिशेकलाई

यस वर्षको ‘सर्वाेत्कृष्ट राष्ट्रिय फुटबल खेलाडी २०७७’ सम्मानबाट राष्ट्रिय टोलीका महत्वपूर्ण सदस्य अभिशेक रिजाललाई पुरस्कृत गरिने भएको छ ।
राष्ट्रिय टोलीमा रहेर राष्ट्रिय तथा अन्तर्राष्ट्रि फुटबल प्रतियोगितका माध्यबाट देशको नाम चिनाउन सफल भएकामा उहाँलाई नगद रु ३५ हजार, प्रमाण–पत्र र दोसल्ला बाट सम्मान गरिने आयोजकले जनाएको छ । प्रतियोगिताको उद्घाटनका अवसरमा रिजाललाई सो सम्मान गरिने क्लबले जनाएको छ ।

प्रतियोगिताको आकर्षकको रुपमा रहेको निर्णायक ट्रफी (रेफ्री), वेष्ट अफ फाईभ ट्रफी, मेन अफ दि म्याच ट्रफी, सर्वोत्कृष्ट खेलाडी ट्रफी, फेयर प्ले ट्रफी एवं खेलाडी मेडल लगाएत म्यान अफ दि म्याच नगद पुरस्कार सहारा यूकेले उपलब्ध गराएको छ ।

पर्यटकीय शहर पोखरालाई ‘स्पोर्टस हब सिटी’को रुपमा परिचित गराउँदै, नवप्रतिभावान फुटबल खेलाडीहरुलाई आफ्नो खेल कौशल प्रर्दशन गर्ने उचित अवसर प्रदान गर्ने लक्ष्य सहित प्रतियोगितालाई निरन्तरता दिइएको क्लबले जनाएको छ ।

क्लबले कोरोना न्यूनीकरणका लागि सरकारबाट निर्देशित मापदण्डको पूर्ण पालना गरिने र गण्डकी प्रदेश खेलकूद परिषद्को सहयोगमा प्रत्येक दिन दर्शकहरुलाई निःशुल्क मास्कको व्यवस्था गरिएको बताइन्छ ।

सहाराले प्रतियोगिताबाट बचत रकम क्लबाट सञ्चालित सहारा फुटबल एकेडेमीमा खर्च गर्दै आएको छ । हाल तेस्रो ब्याचको एकेडेमीमा १४ जिल्लाका २४ जना बालकहरु आश्रित छन् । एकेडेमीमा उनीहरुले निःशुल्क शिक्षा,दिक्षा लगायत फुटबल प्रशिक्षण गर्दै आएका छन् ।

टिप्पणिहरु
Loading...