हिमाली आवाज । कास्कीको मादी गाउँपालिकाले आगामी आर्थिक वर्ष २०७९÷०८० मा पूर्वाधार विकासतर्फ ठूला योजना छनोटलाई प्राथमिकतामा राखेको छ ।
गाउँपालिका अध्यक्ष देवीजङ्ग गुरुङले सोमबार गाउँसभामा आगामी वर्षको वार्षिक नीति तथा कार्यक्रम प्रस्तुत गर्दै साना योजनालाई निरुत्साहित गरिने बताउँदै ‘समृद्ध मादी, सुखी मादीवासी’को नारालाई साकार पार्न ठूला योजना सञ्चालन गरिने बताउनुभयो ।
उहाँले विकास निर्माणलाई दिगो बनाउन साना तथा टुक्रे योजनामा बजेट विनियोजन गर्दा दिर्घकालीन उपलब्धि हासिल नहुने हुँदा यस्ता कार्यमा नियन्त्रण गरी ठूला योजना छनौटलाई प्राथमिकतामा राखिएको बताउनुभयो ।
आन्तरिक सुशासन र सवल प्रशासनको प्रर्वद्धन गरी सेवा प्रवाहमा प्रभावकारिता कायम गर्ने, पर्यटन विकासबाट लाभ प्राप्त गरी सबै क्षेत्रसम्म पु¥याउने पारित कार्यक्रममा उल्लेख छ ।
वन जङ्गलको संरक्षण गर्दै भू–क्षय नियन्त्रण, विपद व्यवस्थापन र वातावरणीय सन्तुलनलाई कायम राख्दै स्थानीय पूर्वाधार निर्माणमा लगानी वृद्धि गरी सडक सुधार गर्दै नियमित रुपमा यातायात सञ्चालन गर्ने तर्फ गाउँपालिकाको वार्षिक नीति तथा कार्यक्रम केन्द्रित रहेको छ ।
स्वास्थ्य बीमामार्फत विशेषज्ञ सेवाको सुलभ पहुँच सुनिश्चित गर्दै थुम्सीकोट प्राथमिक स्वास्थ्य केन्द्रमा बि–फार्मेसी सञ्चालन, गाउँपालिकाका स्वास्थ्य संस्थाहरुवाट निःशुल्क गर्भपतन सेवा विस्तार र महिलाहरुको पाठेघरको मुखको क्यानसरको निःशुल्क परीक्षणको व्यवस्था गरिने कार्यक्रम छ ।
गाउँपालिकाले वैदेशिक रोजगारीबाट फर्केका युवा जनशक्तिलाई पुनः विदेश जान नपर्ने गरी रोजगारीका अवसरहरु सिर्जना गर्ने प्रकृतिका कार्याक्रम सञ्चालन गर्ने भएको छ ।
यसैगरी कृषि क्षेत्रलाई सबल बनाउन युवा जनशक्तिको भरपूर उपयोग मार्फत कृषि क्षेत्रको उत्पादन र उत्पादकत्व वृद्धि गरी आय आर्जन बढाउन उत्पादनमा आधारित अनुदान जस्ता जनमुखी प्रोत्साहनमूलक कार्यक्रम संचालनमा जोड दिएको छ ।
प्रदेश सरकारसँगको साझेदारीमा माटो परीक्षण शिविर संचालन गरी माटोको प्रोफायल तयार गर्ने तथा माटो सुहाउँदो खेती बाली लगाउन प्रोत्साहन गर्ने र कृषक, कृषि समुह,सहकारीको सहकार्यमा ‘एक गाउँ एक उत्पादन’ कार्यक्रम सञ्चालन गरिने अध्यक्ष गुरुङले बताउनुभयो ।
स्थानीय स्रोत, साधन र सीपको प्रयोगलाई बढावा दिई व्यावसायिक उत्पादन तर्फ अग्रसर गराउन राडी पाखी, कम्बल, भाङग्रा, सुइटर, झोला बनाउने तानहरुलाई आधुनिकीकरण गरी व्यावसायिक उत्पादन तर्फ अग्रसर गराउने र स्थानीय वन पैदावर, प्राकृतिक स्रोत साधन, जडिबुटीमा आधारित उद्योगहरु स्थापना गर्न लगानीकर्ताहरुलाई उचित वातावरणको व्यवस्था गरिने नीति कार्यक्रममा उल्लेख छ ।
यसैगरी संघ र प्रदेश सरकारसँगको समन्वय र साझेदारीमा पर्यटकीय गन्तव्यहरुमा रञ्जुमार्ग (केबुलकार), पदमार्ग, लिफ्टिङ खानेपानी, क्याम्पसाइड, सोलारबत्ती, मोबाइलटावर जस्ता पूर्वाधारहरु निर्माण गर्दै लैजाने व्यवस्था मिलाइने अध्यक्ष गुरुङले बताउनुभयो ।
शैक्षिक सत्र विसं २०७९ देखि स्थानीय पाठ्यक्रम पूर्ण रुपमा लागू गर्ने, स्थानीय तहमा कम्तिमा एक प्राविधिक शिक्षालय रहने नेपाल सरकारको नीति अनुसार मादी गाउँपालिकामा प्राविधिक शिक्षालय स्थापना गर्नको निम्ति सङ्घीय तथा प्रदेश सरकार समक्ष आवश्यक पहल गरिने र पालिकाका सबै सामुदायिक विद्यालयहरुमा इन्टरनेटको पहुँचको सुनिश्चिता गरी क्रमशःप्रविधिको पहुँच पु¥याइने नीति कार्यक्रममा समावेश गरिएको छ ।
