हिमाली आवाज । नेपाल शैक्षिक परामर्श संघ(इक्यान) को २९औं स्थापना दिवस पोखरामा पनि मनाइएको छ। सो अवसरमा कास्की शाखाले पोखरा–२५ हेमजास्थित मानव सेवा आश्रममा रहेका आश्रितहरुलाई भोजन वितरण कार्यक्रम सम्पन्न गरेको छ ।
कार्यक्रममा करिब १८५ जना आश्रमवासीलाई प्रेम र आत्मीयतासहित भोजन प्रदान गरिएको इक्यान कास्कीका अध्यक्ष ओमप्रकाश गैरेले हिमाली आवाजलाई जानकारी दिनुभयो । उहाँका अनुसार समाजमा सानो प्रयासबाट ठूलो परिवर्तन ल्याउन सकिने सन्देशसहित कार्यक्रम गरिएको हो ।
सो कार्यक्रममा इक्यान कास्कीका पूर्व अध्यक्ष रमेश थापा, वर्तमान उपाध्यक्ष सन्तोष शाही लगायत इक्यान कास्कीका पदाधिकारी तथा सदस्यहरुको उपस्थिति रहेको इक्यान कास्कीका कार्यसमिति सदस्य राजन पन्थीले जानकारी दिनुभयो । इक्यानले आफ्नो स्थापना दिवस आज पोखरा सहित देशभर विभिन्न कार्यक्रम गरी मनाएको छ ।
