हिमाली आवाज । पोखराको सांगीतिक माहोल तताउँदै व्याण्डहरुलाई पुनःजागृत गराउने उद्देश्यले ‘शिक्षासँगै सङ्गीत’को नारा सहित आयोजना गरिएको तेस्रो संस्करणको अन्तर विद्यालय व्याण्ड प्रतियोगिताको उपाधि पोखराकै गण्डकी बोर्डिङ स्कुलले जितेको छ ।
पोखरा साङ्गीतिक कलाकार संघले विद्यालयतहदेखीनै संगीत र व्याण्डको विकास गर्ने उद्धेश्यले यही भदौ १३ र १४ गते सो प्रतियोगिता आयोजना गरेको हो । प्रतियोगिताको उपाधि चुमेको गण्डकीले नगद रु एक लाख सहित ट्रफी र प्रमाणपत्र पुरस्कार पायो ।
यसैगरी उपाधि सहित गण्डकीले ‘वेस्ट भोकल’, ‘वेस्ट ड्रमर’ र ‘बेस गिटार’वादकको विधागत पुरस्कार समेत हात पार्न सफल भयो ।
प्रतियोगितामा प्रतिभा मावि ‘ए’ द्वितीय र डाइमन्ड बोर्डिङ स्कुल तृतीय बने । द्वितीय स्थान प्राप्त गरेको प्रतिभाले नगद रु ५० हजार र तृतीय हुने डायमन्डले नगद रु २५ हजारसहित ट्रफी र प्रमाणपत्र पुुरस्कार पाएका छन्।
‘लिड गिटार’वादक तर्फ कास्की मोडर्नाइज्ड विजेता बन्यो । उत्कृष्ट गायन गर्ने विद्यार्थीलाई जनही रु पाँच हजार, ट्रफी, प्रमाणपत्र र एक वर्षको निःशुल्क इन्टरनेट सेवा प्रदान गरियो भने अन्य विधाका उत्कृष्टलाई जनही रु पाँच हजार, ट्रफी र प्रमाणपत्र प्रदान गरिएको पोखरा सांगीतिक कलाकार संघका सचिव अमित गुरुङले जानकारी दिनुभयो।
प्रतियोगितामा पोखराका कूल १७ वटा विद्यालयले प्रतिस्पर्धा गरेका थिए । सुरुआती प्रस्तुतीको आधारमा फाइनल चरणको लागि १० टिम छानिएका थिए । विजेताहरूलाई पोखरा महानगरपालिकाका प्रमुख धनराज आचार्य, संघका अध्यक्ष हर्कराज गुरुङ (भाइ), कार्यक्रम संयोजक तेज केसी, पोखरा प्रज्ञा प्रतिष्ठानका संस्थापक कुलपति पदमराज ढकाल लगायतले पुरस्कार वितरण गर्नुभयो ।
कार्यक्रममा महानगर प्रमुख आचार्यले प्रतियोगिताले नयाँ पुस्तालाई साङ्गीतिक क्षेत्रमा अगाडि बढ्न उत्पेरित गरेको बताउनुभयो । उहाँले भन्नुभयो,“प्रतियोगिताले पोखराको कला र सङ्गीतको विकासमा सघाउ पुगेको छ । पर्यटकीय राजधानी पोखरा यस्तै खालका कला, साहित्य, संगीत र खेलकुदले विश्वमा चिनाएको छ । ”
