हिमाली आवाज । विश्वकै उच्च उचाइमा आयोजना हुने प्रतिष्ठित गल्फ प्रतियोगिता ‘टप अफ दी वल्र्ड गल्फ क्लासिक’को चौथो संस्करणको यही भदौ २८ र २९ गते हुने भएको छ ।
मुस्ताङको लोमान्थाङमा अवस्थित चार हजार सात सय मिटर उचाइमा रहेको लोवथाङ गल्फ कोर्समा प्रतियोगिता हुने आयोजक मुस्ताङ गल्फ कोर्सले आज पोखरामा पत्रकार सम्मेलन आयोजना गरी जानकारी दिएको हो ।
प्रतियोगितामा स्वदेश तथा विदेशबाट गरी ६० भन्दा बढी गल्फरहरूको सहभागिता रहने आयोजक संस्था मुस्ताङ गल्फ कोर्सका प्रबन्ध निर्देशक इन्द्रधारा विष्टले जानकारी दिनुभयो । उहाँका अनुसार यस संस्करणमा नेपालका शीर्ष गल्फ खेलाडीहरूले पनि प्रतिस्पर्धा गर्नेछन् ।
गत वर्षसम्म नौ होलमा सीमित प्रतियोगिता यस वर्ष १८ होलमा विस्तार गरिएको बताइन्छ । प्रतियोगितामा विजेताहरूलाई क्रमशः रु ३० हजार, रु २० हजार र रु १० हजार नगदसहित ट्रफी पुरस्कार प्रदान गरिने छ ।
यसैगरी ‘होल इन वान’ गर्ने भाग्यशाली खेलाडीलाई पुरस्कार स्वरूप घोडा दिइने प्रवन्ध निर्देशक विष्टले बताउनुभयो । यो पुरस्कार विश्वभरका गल्फरहरूका लागि अनौठो अनुभव हुने उहाँको भनाई छ ।
प्रतियोगिता ‘स्टेवलफोर्ड’ ढाँचामा खेलाइनेछ । जस अन्तर्गत विजेता, उपविजेता, बेस्ट ग्रस, लेडी विजेता, सिनियर विजेता, ‘क्लोजेस्ट टु द पिन’, ‘मस्ट बर्डिज’, र ‘लङ्गेस्ट ड्राइभ’का लागि छुट्टाछुट्टै पुरस्कारहरू प्रदान गरिने आयोजकले जनाएको छ ।
यसैगरी यस वर्षको संस्करण ‘टी फर क्लाइमेट’ भन्ने नारासहित सञ्चालन हुने विष्टले बताउनुभयो । “मुस्ताङ अहिले जलवायु संकटको चपेटामा छ । यसबारेमा विश्वको ध्यानाकर्षण गराउन हामी उच्च स्थानको गल्फ कोर्सबाट सन्देश प्रवाह गर्दैछौँ । ” प्रवन्ध निर्देशक विष्टले भन्नुभयो ।
खेलसँगै स्थानीय कला, संस्कृति र संगीतका विविध प्रस्तुतीहरू पनि प्रतियोगिता अवधिभर प्रस्तुत गरिने आयोजकको भनाई छ।
प्रतियोगिताका लागि गण्डकी प्रदेश सरकार, लोमान्थाङ गाउँपालिका तथा विभिन्न संघसंस्थाहरूको सहकार्यमा प्रतियोगिता सम्पन्न हुनेछ । प्रतियोगिता सम्पन्न गर्न रु १० देखी रु १२ लाख खर्च हुने अनुमान गरिएको छ ।
