हिमाली आवाज । पोखरा महानगरपालिका–१९ पुरुञ्चौरको चुरुङ्गामा दाईं महोत्सवको दोस्रो संस्करण हुने भएको छ । पोखरा पर्यटन परिषदको आयोजनामा मंसिर १३ गते शनिबार चुरुङ्गामा दाईं महोत्सव हुन लागेको हो ।
यसअघि अघिल्लो वर्ष दाईं महोत्सवको पहिलो संस्करण पोखरा–२३ फेवा फाँट, मार्गीमा भएको थियो । पोखरा पर्यटन परिषदले प्रत्येक असार १५ मा रोपाईं महोत्सव गर्दै आएको छ । दुई दशक अघि शुरु भएको रोपाईं महोत्सवको २१ औं संस्करण गत असारमा भएको थियो । दाईं महोत्सव स्थल पर्यटकीय गन्तव्य रहेको महोत्सवका संयोजक तथा परिषद्का बरिष्ठ उपाध्यक्ष हरि भुजेलले जानकारी दिनुभयो ।
उहँका अनुसार ४ वटा धानका कुनियो रहेको सो स्थलमा १० भन्दा बढी गोरुले दाईं गर्नुका साथै धान चुट्ने, धानको राश बनाउने र बत्ताउने कार्य गरिनेछ । परम्परागत दाईंको झल्को दिन खाजा र खाना पनि परालमाथि र बारीको पाटामा बसेर खाने व्यवस्था गरिने आयोजक पोखरा पर्यटन परिषदका अध्यक्ष तारानाथ पहारीले जानकारी दिनुभयो । उहाँका अनुसार पोखराका होटलहरुमा बास बसेका विदेशी पर्यटकहरुलाई गाडी रिजर्भ गरेर दाई महोत्सव अवलोकनका लागि लगिने छ ।
महोत्सवको अवसरमा उत्कृष्ट धान उत्पादन गर्ने किसानलाई नगद १० हजार, दोस्रो हुनेलाई ७ हजार र तेस्रो हुनेलाई ५ हजारसहित पुरस्कृत गरिने उहाँले बताउनुभयाे । महोत्सवमा उत्कृष्ट गोरु पालक प्रतियोगिता, धान चुट्ने प्रतियोगिता, परालको भारी बाँध्ने प्रतियोगिता, गुन्द्री बुन्ने प्रतियोगिता समेत छन् । प्रतियोगिताका बिजेताहरुलार्य नगदसहित पुरस्कृत प्रदान गरिने छ ।
मौलिक तथा परम्परागत दाईंको संरक्षण र प्रवद्र्दन गर्ने उद्देश्यले महोत्सव गर्न लागिएको परिषदले जनाएको छ । गोरुले दाईं गर्ने परम्परा संरक्षण र प्रवद्र्धन गर्ने उद्देश्य महोत्सव राखिएको हो ।
दाईं महोत्सव गर्न लागिएको क्षेत्रमा झिनुवा धानको खेती बढी हुने गरेको स्थानिय आयोजकका रुपमा रहेको चुरुङ्गा टोल विकास संस्थाका अध्यक्ष दयाराम गौतमले बताउनुभयो । महोत्सवले ओझेलमा परेको पर्यटकीय गन्तव्य चुरुङ्गाको प्रचार प्रसारमा समेत सघाउ पुग्ने विश्वास व्यक्त गर्नुभयो ।
