हिमाली आवाज । पोखरा अन्तर्राष्ट्रिय विमानस्थल परिसरमा अत्याधुनिक हवाई इन्धन डिपो निर्माण सम्पन्न भएको छ ।
नेपाल आयल निगमले पहिलो पटक आफ्नै लगानीमा विमानस्थलमा ३६ लाख लिटर क्षमताको हवाई ईन्धन डिपो निर्माण गरेको आज पोखरामा पत्रकार सम्मेलन गरी जानकारी दिएको हो । निगमले स्वदेशी सीप र पूँजीमा पहिलोपटक इन्धन डिपो निर्माण गरिएको जनाएको छ ।
हवाई इन्धन डिपो निर्माण परियोजनाका प्रमुख इन्जिनियर प्रदीप यादवले पोखरा अन्तर्राष्ट्रिय विमानस्थलमा उडान र अवतरण गर्ने राष्ट्रिय र अन्तर्राष्ट्रिय विमानलाई आवश्यक पर्ने इन्धन उपलव्ध गराउन विमानस्थल परिसरमा अत्याधुनिक प्रविधि जडित हवाई इन्धन डिपो निर्माण गरिएको बताउनुभयो ।
उहाँका अनुसार यसअघि भारतीय आयल निगमको सहयोगमा हवाई ईन्धन डिपो निर्माण हुँदै आएकामा पहिलोपटक यस डिपो निर्माणमा निगमको आफ्नै लगानी रहेको छ ।
पोखरामा राष्ट्रिय तथा अन्तर्राष्ट्रिय उडानको चापलाई मध्यनजर गर्दै एक हजार दुई सय किलोलिटर क्षमताको तीन वटा ठूला भण्डारण गृह (कूल तीन हजार छ सय किलोलिटर इन्धन भण्डारण गर्न मिल्ने स्टोरेज ट्यांक) निर्माण गरिएको हो । भर्टिकल स्टोरेज ट्यांकको उचाई १२ मिटर र व्यास पनि १२ मिटर रहेको निगमले जनाएको छ ।
“स्वदेशी प्राविधिक र स्वदेशी निर्माण कम्पनीले निर्माण गरेकाले पनि निगमको ५५ वर्षे ईतिहासमा यो डिपो ऐतिहासिक भएको छ । यसअघि लगानी मात्र विदेशीको होईन, प्राविधिक र निर्माण कम्पनीपनि विदेशीनै हुन्थे । त्यसलाई तोड्दै सतप्रतिशत स्वदेशी परामर्शदाता, स्वदेशी निर्माण व्यवसायी र आन्तरिक स्रोतबाट बनाउन सक्षम भएका छौँ ।” आयोजना प्रमुख यादवले भन्नुभयो ।
आयोजना प्रमुख यादवले तोकिएको समयभित्रमानै डिपो निर्माण सम्पन्न भएको जानकारी दिनुभयो । सो डिपो निर्माणका लागि मुल्यअभिवृद्धि कर (भ्याट) बाहेक रु ७५ करोड खर्च भएको छ । विस २०८० साउन १ गते निर्माण कार्यको शिलान्यास गरिएको थियो । सो डिपोेबाट आगामी साउन दोस्रो साताबाट इन्धन भर्न सुरु हुन्छ ।
डिपो सुरक्षामा उच्च सतर्कता अपनाउनका लागि एक हजार दुई सय किलोलिटर क्षमताको अलग्गै पानी ट्यांकी निर्माण सम्पन्न भएको छ । उक्त पानी ट्यांकीसँग डिपोको वरीपरी जडान गरिएको ‘फायर फाइटिङ’ संरचनालाई आवद्ध गरिएकाले उच्च सुरक्षा प्रदान गर्ने निगमका सहायक प्रवन्धक अनुपम पराजुलीले बताउनुभयो ।
“हवाइ इन्धन जस्तो प्रज्वलनशील पदार्थको नियमित रुपमा कारोबार हुँदा आगलागीको जोखिम हुन सक्ने कुरालाई मध्यनजर गर्दै चार हजार लिटर क्षमताको ‘फोम स्टोरेज’ ट्यांकसमेत निर्माण गरिएको छ । यसलाई फायर फाइटिङको संरचनासँग आवद्ध गरिएकाले पानीको फोहोरासँगै फोम पनि मिसिएर प्रवाह हुने र तत्कालै आगलागीजन्य घटनालाई निस्तेज पार्न सहयोग मिल्ने गरेको विश्वव्यापी अभ्यास छ।” पराजुलीले भन्नुभयो ।
पोखरा अन्तर्राष्ट्रिय विमानस्थलका लागि आवश्यक पर्ने इन्धनका लागि आयल निगमले विमानस्थल परिसरमा नौ हजार दुइ सय १५ वर्गमिटर क्षेत्रफलको जग्गा नागरिक उड्डयन प्राधिकरणसँग ‘लिज’ सम्झौता गरी निगमले उपयोग गर्दै आएको जनाएको छ ।
