हिमाली आवाज । नेपाल कम्युनिष्ट पार्टी(माओवादी केन्द्र)का महासचिव देवप्रसाद गुरुङले देशमा अस्थिरता र अराजकता सिर्जना गर्ने प्रयास भइरहेको बताउनुभयो ।
नेकपा(माओवादी केन्द्र) पोखरा महानगरपालिका–१७ ले आज आयोजना गरेको शुभकामना आदानप्रदान कार्यक्रम तथा अनेमसंघ(क्रान्तिकारी)को तेस्रो सम्मेलनको उद्घाटन गर्दै उहाँले विभिन्न शक्तिहरुले देशमा द्धन्द्ध सिर्जना गरेर संकट निम्त्याउने प्रयास गरेकाले राष्ट्रिय एकता बलियो बनाउनुपर्नेमा जोड दिनुभयो ।
“अहिलेको व्यवस्थालाई कमजोर बनाउने प्रयास भएको छ । दलहरुबीचको मजवुत एकताबाट मात्र राष्ट्रिय स्वाधिनता र एकताका लागि बल पुग्दछ । वर्तमान व्यवस्थाको विकल्प छैन ।” महासचिव गुरुङले भन्नुभयो ।
नेता गुरुङले देश स्वाधिन बन्न बन्नका लागि भ्रष्टाचारको अन्त्य हुनैपर्नेमा जोड दिनुभयो । माओवादीको नेतृत्वमा बनेको अघिल्लो सरकारले सुशासनका लागि काम गरेकाले जनतामा समेत उत्साह छाएको बताउनुभयो ।
महासचिव गुरुङले देश विकास र माओवादी केन्द्रको विकल्प नभएको समेत बताउनुभयो । उहाँले भन्नुभयो,“केही सीमा र कमजोरी भएपनि माओवादीको विकल्प अन्य दल हुन सक्दैनन् । अहिले आकारमा सानो भएपनि व्यवस्थाको रक्षा माओवादीले मात्र गर्न सक्छ ।”नेता गुरुङले विभिन्न चाडपर्वहरुले देशमा राष्ट्रिय एकता बलियो बनाउने र नेपाली समाजको एकताको आधार बनेको उल्लेख गर्नुभयो ।
कार्यक्रममा संविधानसभा सदस्य एवं सो पार्टीका केन्द्रीय सदस्य तेजकुमारी पौडेल, दुर्गा विक, गंगा पोखरेल, अखिल नेपाल महिला संघ(क्रान्तिकारी)का कास्की अध्यक्ष सृजना त्रिपाठी लगायत, माओवादी केन्द्र पोखरा–१७ का अध्यक्ष गान्धी गुरुङ लगायतले माओवादीले मात्र जनताको हक हित र अधिकारको रक्षा गर्न सक्ने बताउनुभएको थियो ।
अनेमसंघ(क्रान्तिकारी) पोखरा–१७ को अध्यक्षमा परियार
यसैबीच सम्मेलनले सुमित्रा परियारको अध्यक्षतामा अनेमसंघ(क्रान्तिकारी) पोखरा–१७ को समिति सर्वसम्मत चयन गरेको छ ।
समिति उपाध्यक्षमा औसरा गुरुङ, सचिव दिलमाया गुरुङ, सहसचिव प्रतिक्षा परियार र कोषाध्यक्ष कल्पना शाही चयन हुनुभयो ।
सदस्यहरुमा लोकमाया गुरुङ, जितमाया बस्नेत,डिलमाया गुरुङ,सुकमाया परियार,मैया परियार,कौसिला परियार,सीता शाही, देवी परियार र देवकी लामिछाने रहनुभएको छ ।
